បាត់ដំបង៖ អគ្គិភ័យឆាបឆេះឃ្លាំងស្ដុកស៊ីទែនប្រេងសាំងមួយកន្លែងនៅក្នុងស្រុកបាណន់ ខេត្តបាត់ដំបង នៅរសៀលនេះ បណ្ដាលឱ្យមនុស្សម្នាក់រងរបួស និងឆេះរាលដាលដល់ផ្ទះមួយកន្លែងផងដែរ។

សេចក្តីរាយការណ៍បឋមបានអោយដឹងថា ករណីឆាបឆេះឃ្លាំងស្តុកស៊ីទែនប្រេងសាំង និងរាលឆេះដល់តួផ្ទះម្ចាស់លក់គ្រឿងសំណង់ខូចខាតស្ទើរទាំងស្រុងកើតឡើងនៅវេលាម៉ោង១៦និង១៥នាទី ថ្ងៃទី២០ ខែតុលា ឆ្នាំ២០២១ នៅចំណុចភូមិឈើទាល ឃុំឈើទាល ស្រុកបាណន់ ខេត្តបាត់ដំបង។

ពលរដ្ឋនៅកន្លែងកើតហេតុឱ្យដឹងថា នៅមុនពេលកើតហេតុគេឃើញរថយន្តធុនតូចមួយគ្រឿងដឹកស៊ីទែនសាំងរបស់ក្រុមហ៊ុន TELA បានដឹកសាំងចូលទៅឃ្លាំងខាងក្រោយផ្ទះម្ចាស់លក់គ្រឿងសំណង់យីហោ ម៉ាន់ ចៃ គោលបំណងដើម្បីផ្ទេរសាំងទុក លុះក្រោយមកក៏ស្រាប់តែលឺសំលេងផ្ទុះឡើង និងមានអណ្តាតភ្លើងឆេះមកយ៉ាងសន្ធោសន្ធៅ បណ្តាលឱ្យឆេះស្រោចដល់តៃកុងឡាន និងត្រូវបានអ្នកស្រុកជួយអន្តរាគមន៍នាំយកទៅសង្គ្រោះនៅឯមន្ទីរពេទ្យភ្លាមៗ។

សមត្ថកិច្ចនៅមិនទាន់វាយតម្លៃពីទំហំនៃការខូចខាតនៅឡើយទេ ខណៈអគ្គិភ័យបានបំផ្លាញរថយន្តដឹកសាំង១ និងសម្ភារខាងក្នុងឃ្លាំងអស់ជាច្រើន ហើយផ្ទះកំពស់០៣ជាន់ជាប់ឃ្លាំងនោះក៏រងការខូចខាតផ្នែកខាងក្រោយស្ទើរទាំងស្រុងផងដែរ៕